الاثنين، ٣٠ أبريل ٢٠٠٧

دورة شباب الاحزاب _تعديل

السلام عليكم
حصل تعديل كده فى حكايه الدورة
انا كنت امبارح فى المركز
اول حاجه بتملى الاستمارة
وبعدين بيعملو معاك انترفيو
والبنت هناك قالتلى ميعاد التقديم .. اتقدم اسبوع كمان
يعنى الى عايز يلحق يروح يلحق
والدورة هتبقى فى اول 6
ولو فى امتحانات ... هتبقى فى دورة تانيه فى الصيف لكن هيكون عليها اقبال شديد
فنسبه القبول فى دى هتبقى افضل
كان فى استفسارات فى البوست الى انا عاملته .. ان لازم اكون منتمى لحزب ولا لا ؟
لا مش لازم ممكن تكون حركه او جماعه
زى كفايه او اخوان مسلمين
وبردو احتمال يكون فى ناس مش منتميه لاى الاحزاب .. بس انا مش متاكده بصراحه من النقطه دى
يالا بقى السلام عليكم ... واى حد عنده استفسارات ممكن يقولها ... او يتصل على الرقم الى موجود فى البوست الى فات http://banatelerian.blogspot.com/2007/04/blog-post_25.html
ده البوست لو حد حب يطلع عليه

السبت، ٢٨ أبريل ٢٠٠٧

كل عام وانتى بخير يا عائلتى




فى هذا الشهر بل فى هذا اليوم مولد اعظم رجل فى نظرى ولد ابى .. وولدت معه حياتى


فى يوم 28-4-1954 ولد عصام الدين محمد حسين العريان

وفى يوم 29-4 ولد ابراهيم عصام العريان

وفى يوم 5-5-2005 ولدت فاطمه الزهراء .. بنت اختى سارة

وفى يوم 13-5 ولدت سارة عصام الدين محمد العريان

وفى يوم 15-5 ولدت سميه عصام الدين محمد العريان

فى هذين الشهرين ولدت معظم عائلتى


واقول لهم كل عام وانتم بخير وبصحه وبسلام وعقبال مليون سنه تختموهم بشهادة فى سبيل الله

واقول رساله الى ابى فى يوم مولدة

الى اغلى اب واعظم رجل فى حياتى ... كل عام وانت الى الله اقرب .. وعلى طاعته ادوم .. كل عام وانت لسنه نبيه اتبع


كل عام وانت بخير وبصحه وسلامه وبدون اعتقالات


يارب دايما تبقى جنبى ومتبعدش عنى .. وان شاء الله هديتك عندى هتكون نجاحى .. ادعولى بقى انى انجح.. عقبال مليون سنه تختمهم بشهادة فى سبيل الله


احبك يا اعظم اب فى الوجود





مش لاقيالك صورة يا ابراهيم .. ملاقيتش غير دى تكون انسب صورة ليك :D :D




رساله الى اخى ابراهيم..

كل عام وانت بخير يا اخى الوحيد ... وعقبال ما نباركلك يوم بناءك....وربنا يسعدك انت وزوجتك دايما ... ويارب تسافر وتاخد المعادله ...وربنا ييسر لك حياتك ويسعدك ويرزقك الاولاد الصالحين












الى فى الصورة دى مع بابا تبقى بطوط الى هى فاطمه الزهراء....بنت اختى سارة

ورسالتى ليها


يالا يا بطوط اكبرى وورينا همتك فى المذاكرة واوعى تطلعى زى خالتك فى المذاكرة ... وكل سنه وانتى طيبه يا قمر ... وهديتك هتوصلك ان شاء الله ... غالبا هتبقى لعبه يا بطوط .. متطمعيش




ورساله لاختى الكبيرة سارة العريان


كل سنه وانتى طيبه يا اختى .. ربنا يسعدك فى حياتك ... ومبروك العربيه ... وعقبال لما نشوف حفصه وبطوط وعبد الرحمن فى الجامعه ان شاء الله ... وان شاء الله هيطلعو ذريه صالحه زى خالتهم :D:D


ورسالتى لسميه اختى ... دى بقى هتبقى فى بوست لوحده يوم ميلادها


يالا نستودعكم الله ... وياريت الكل يدعيلى

الأربعاء، ٢٥ أبريل ٢٠٠٧

دورة شباب الاحزاب

هل أنت شاب/ة وعضو/ة في حزب سياسي ولديك الرغبة في أن تلعب/ي دورًا في التحول الديمقراطي في مصر؟ .. بادر/ي فورًا بالتسجيل في دورة تدريبية جديدة لشباب الأحزاب15/4/2007

هَل ...• تنتمي إلي حزب سياسي أو حركة سياسية مصرية؟• معني بقضايا الإصلاح السياسي في بلدك؟• تريد أن تتعلم اليوم صفات قائد الغد؟• مهتم باستكشاف آليات حقوق الإنسان؟• مستعد لمواجهة التحديات والإطلاع إلي أفق جديدة؟ نَعم؟ فـــ يتشرف مركز القاهرة لدراسات حقوق الإنسان أن يعلن لك عن بدء التقديم للدورة التدريبية الثانية لشباب الأحزاب السياسية المصرية المصممة لمساعدتك علي تنمية الفكر الناقد حول قضايا حقوق الإنسان والتحول الديموقراطي، كما تهدف إلي إكتشاف قدراتك الكامنة في إحداث التغيرات وتحسين الواقع السياسي والإجتماعي. وتعتمد هذه الدورة التدريبية علي التفاعل وتبادل وجهات النظر والإقتراحات والخبرات ما بين المحاضرين وشباب الأحزاب والحركات السياسية المصرية حول الإصلاح السياسي في مصر. ستعقد الدورة التدريبية لمدة ستة أيام خلال شهر مايو أو يونيو 2007 بالقاهرة. وتتناول الورشة عدة محاور منها:• ماذا يعني بالنسبة لك كمواطن إلتزام حكومتك بالإتفاقيات الدولية لحقوق الإنسان ؟• هل الديمقراطية قيمة تعني الشباب أم لا؟ وكيف يمكن أن تشارك في تحقيقها؟• كيف يشعر المواطن العادي بأن هناك إحتراما حقيقيا لمبدأ المواطنة؟• هل مكافحة الإرهاب تستلزم التضحية بحقوق الإنسان؟• ما هي وضعية حقوق المرأة في مصر؟• كيف تبتكر أساليب للتأثير في السياسات العامة؟ • ما الذي تضيفه قدرات العمل الجماعي؟المُستهدَفون: هم فئة شباب الأحزاب والحركات السياسية في مصر (علي ألا يتجاوز سن المتقدم/ة 35 عاما). لا يشترط خبرة أو معرفة سابقة عن ماهية حقوق الإنسان للإشتراك في الدورة التدريبية حيث أن الإشتراك مفتوح لكل من لديه الرغبة في تعلم ونشر ثقافة حقوق الإنسان. ويشجع المركز بصفة خاصة كلا من النساء المنخرطات في العمل السياسي مع الأحزاب والحركات السياسية المختلفة علي التقديم، كما يشجع المركز أيضا شباب الأحزاب من محافظات مصر المختلفة للتقديم لهذه الدورة. هذا وسيقوم المركز بتغطية تكاليف الإقامة لكل المشاركين من خارج محافظة القاهرة. مُستعِد؟ علي الراغبين/ات في الترشيح للمشاركة في الدورة التدريبية، إجراء مقابلة شخصية بمقر المركز: 9 ش رستم جاردن سيتي، الدور العاشر، بدءا من 15 أبريل 2007 وحتي موعد أقصاه 29 أبريل 2007 ما بين الساعة الثانية والسادسة مساء طوال أيام الأسبوع عدا يومي العطلة الأسبوعية في الجمعة والسبت.ويرجي ملء وتقديم الإستمارة المرفقة أدناه والتي يمكن الحصول عليها من خلال موقع المركز علي الإنترنت www.cihrs.orgوللحصول علي المزيد من المعلومات يرجي الإتصال بـ الزهراء رضوان، مسئولة برنامج تعليم حقوق الإنسان، علي
027951112 أو من خلال البريد الإلكتروني zahra@cihrs.org*الموعد النهائي سيحدد قريبا.
يا جماعه اخر موعد للتسجيل يوم 29 -4 يعنى يوم الاتنين الجاى
وهما اجازتهم جمعه وسبت
ومواعيد العمل من 9 صباحا ل5 مساءا
واستمارة التسجيل ده الينك بتاعها للى يحب يطلع عليها

الثلاثاء، ١٠ أبريل ٢٠٠٧

لماذا هاعيش واتحدى احزانى ؟؟


 السلام عليكم

كما وعدت فى بوست هاعيش واتحدى احزانى .. انى هاكتب ليه انا اخترت الاسم ده

فانا ها هنا لكى افى بوعدى واكتب لكم لماذا اخترت هذا الاسم

يمكن عشان انا مخنوووووقه اوى

يمكن عشان انا مضايقه من بعض المشاكل

يمكن عشان انا مقصرة مع ربى

يمكن عشان انا مقصرة مع بعض اصدقائى

يمكن عشان مش حاسه انى واخدة حريتى الكافيه فى البوح بكل ما بداخلى

يمكن لانى مش لاقيه اى حد فاهمنى .. رغم ان كل الى اعرفهم بيقولو اننا فاهمينك

يمكن لانى بدات اقلق على حال بلدى

يمكن لانى حاسه اننا كطلاب ملناش الحق فى اننا نمارس اقل حقوقنا

يمكن خايفه من المستقبل

يمكن حاسه انى مش بتعلم صح

يمكن حاسه ان فى ذرة من الياس زرعت بداخلى

يمكن مش حاسه بالرضا عن النفس

يمكن ويمكن و.........



بس وبعدين يا اسماء

ما انتى لازم تعيشى

بايدك ولا مش بايدك لازم تعيشى

لازم تكملى بقيه حياتك الى مكتوبالك

بس ليه يا سماء تنظرى للحياة بالمنظور  ده

ليه متحوليش ذرة الياس لذرة امل انتى ممكن الى هتبتتدى تغيرى فى بلدك

ليه متتعلميش من اخطاك وتستفيدى منها

ليه يهمك كلام الناس وانتى شايفه انك صح

ليه يهمك الناس فهماكى ولا المهم انتى الى تكونى فاهمه نفسك

ليه متحاوليش انك توصلى لرضا الرحمن

ليه مقصرة مع اصحابك .. رغم ان دى نعمه انعمها عليكى ربنا

ليه متكونيش انتى بذرة تنبت الاصلاح

رغم كل هذا ورغم الاهموم ورغم الاحزان ورغم المشاكل ورغم الاعتقالات

انا هاعيش واتحدى احزانى


يا جماعه بالله عليكو اى حد يقرا البوست ده يدعيلى

عشان الواحد بجد اتخنق

الجمعة، ٦ أبريل ٢٠٠٧

هاعيش واتحدى احزانى





السلام عليكم

طبعا كلكم تتسالون لما هذا التغيير .. ؟

 

انا كنت بفكر اعمل بلوج تانى خالص واكتب فيه .. فقلت بقى عشان التوفير وعشان منعانيش زى ما عنينا فى البلوج ده ومنوجهش المشكلات الى واجهناها .. قلت هستمر فى هذا البلوج

طيب بردو هتسالونى انتى ليه غيرتى الاسم .. بصراحه شديدة انا كنت عايزة اكتب حاجات كتيرة اوى عن ى انا وخواطر ليا انا .. ومش عايزاها  ترتبط بانى بنت العريان انا اينعم انا ساظل اسماء العريان بس على الاقل ابقى نفهمه الناس انى بنقل تفكيرى انا 

خاصه انى حسيت ان فى توقعات اكتر من كده .. وخاصه بعد ما فى صحفيه امريكيه بتكلم بابا وبتقوله .. شفت اولادك عملو مدونه

قالها عملوها من ورايا والله

فقلت الموضوع والله شكله كبير .. وشكل كلام الولد اخويا الكبير صح .. وان انا مش قدها

يا جماعه انا بعلنها اهو ان المدونه دى بتاعتى انا بتدل على شخصيتى انا بتدل على انى انسانه من الاخوان اينعم انا بنت العريان وافتخر انى بنت العريان .. بس هذا لا يعنى انى العريان ذات نفسه




انا من اهدافى الى كنت عامله بيها المدونه انى اظهر الجانب الانسانى فى عائله العريان .. احنا مش كل حياتنا اعتقالات ولا كل حياتنا سياسه ولا كل حياتنا مبارك

احنا ناس عاديه .. بتاكل بتشرب وبتتجوز وبتنام وبتعتقل بردو وبنكلم فى التليفون .. وبنضحك وبنهزر

انا كنت عايزة ابين ان عصام العريان .. اب .. وجد.. وعم ..وصديق ..وفلاح ..وزوج .. وسياسى

ان العائله لا يغلبها الطابع السياسى .. العائله ساعات كلنا بجتمع ونقعد وكل القاعده تبقى ضحك وهزار

يعنى انا مش من اهدافى ان المدونه دى تبقى سياسيه

انا لما بابا جه وقالى ان المدونه وصلت للصحافه الامريكيه .. قلتله اوبس احنا كده بنعلب فى العالى ..

فانا عايزة العب على قدى .. انا عامله البلوج ده عشان انا كل ما تجيلى فوكيرة او اخاطرة او كايه او موقف او اى حاجه حصلتلى ادخل اقولها

مش هاقعد ادخل واتكلم عن السياسه والنظام ومبارك ووووو

ده لا يمنع انكم ممكن تلاقو سياسه

بس مش هيبقى الغالب علينا السياسه



ثانيا حكايه انفصالى انا واختى فى المدونه .. بصراحه انا واختى شخصيات مختلفه وكل ما تعمل تعليق فى اى مدونه تانيه اقولها متنسيش سميه العريان فى الاخر .. فهى هتعمل مدونه تانيه وانا هافضل فى المدونه دى على امل ان الناس تتفهم ما قلته

لماذا هاعيش واتحدى احزانى .؟

فى البوست القادم ان شاء الله

ارجو تفهم كلامى انا ساظل كما انا اسماء العريان ستطرح عن نفسها وعن افكارها وعن ارائها وعن عائلتها من الجانب الانسانى