الثلاثاء، ١٠ أبريل ٢٠٠٧

لماذا هاعيش واتحدى احزانى ؟؟


 السلام عليكم

كما وعدت فى بوست هاعيش واتحدى احزانى .. انى هاكتب ليه انا اخترت الاسم ده

فانا ها هنا لكى افى بوعدى واكتب لكم لماذا اخترت هذا الاسم

يمكن عشان انا مخنوووووقه اوى

يمكن عشان انا مضايقه من بعض المشاكل

يمكن عشان انا مقصرة مع ربى

يمكن عشان انا مقصرة مع بعض اصدقائى

يمكن عشان مش حاسه انى واخدة حريتى الكافيه فى البوح بكل ما بداخلى

يمكن لانى مش لاقيه اى حد فاهمنى .. رغم ان كل الى اعرفهم بيقولو اننا فاهمينك

يمكن لانى بدات اقلق على حال بلدى

يمكن لانى حاسه اننا كطلاب ملناش الحق فى اننا نمارس اقل حقوقنا

يمكن خايفه من المستقبل

يمكن حاسه انى مش بتعلم صح

يمكن حاسه ان فى ذرة من الياس زرعت بداخلى

يمكن مش حاسه بالرضا عن النفس

يمكن ويمكن و.........



بس وبعدين يا اسماء

ما انتى لازم تعيشى

بايدك ولا مش بايدك لازم تعيشى

لازم تكملى بقيه حياتك الى مكتوبالك

بس ليه يا سماء تنظرى للحياة بالمنظور  ده

ليه متحوليش ذرة الياس لذرة امل انتى ممكن الى هتبتتدى تغيرى فى بلدك

ليه متتعلميش من اخطاك وتستفيدى منها

ليه يهمك كلام الناس وانتى شايفه انك صح

ليه يهمك الناس فهماكى ولا المهم انتى الى تكونى فاهمه نفسك

ليه متحاوليش انك توصلى لرضا الرحمن

ليه مقصرة مع اصحابك .. رغم ان دى نعمه انعمها عليكى ربنا

ليه متكونيش انتى بذرة تنبت الاصلاح

رغم كل هذا ورغم الاهموم ورغم الاحزان ورغم المشاكل ورغم الاعتقالات

انا هاعيش واتحدى احزانى


يا جماعه بالله عليكو اى حد يقرا البوست ده يدعيلى

عشان الواحد بجد اتخنق

هناك ٢٨ تعليقًا:

محمد القصاص يقول...

و الله يا أسماء قولتى اللى نفسى فيه.. ربنا يكرمك و يهون عليكى و ينفع بيكى إن شاء الله و على فكرة الإسم حلو اوى و معبر اوى اوى ...ربنا يثبتك و يثبتنا إن شاء الله

محمد يقول...
أزال المؤلف هذا التعليق.
محمد يقول...

السلام عليكم

والله كأنك تقرأين ما بداخلي

أخشى أن تكون حالة عامة

ربنا يثبتك ويعينك

ولا تحزني .. فإن مع العسر يسرا

لعله خي .. الحمدلله

Anas User يقول...

من أصعب الاشياء على النفس هي كل

معاني الإحباط و اليأس ...

و أفضلها عكس المعاني دي

الطموح

الأمل

النجاح

أنا مرت على فترات كتير كده

و قررت إني لازم ما أسيبش المعاني

البائسة دي تسيطر على نفسي

و عملت حاجة بسيطة

و حضرتك قريتيها في مدونتي

و هي تدوينة عن إنجازات الذات و نجاحاتها

و نويت إن شاء الله كل ما أكون مخنوق

أقرأها عشان أعيد الطموح و الأمل لذاتي

أتمنى لو كل واحد فينا تكون الفكرة دي مفيدة ليه

و بالنسبة لإسم المدونة فهو فعلاً معبر

و مليان طموح ...

إنتهى ...

صاحب الهوامش
http://www.algam3a.com/hawamesh

غير معرف يقول...

تدوينة ممتازة........وفيها وقفة مع النفس ياريت كلنا نقفها

انا عارف انك مقدمة المشيئة بس يا اخت اسماء انا عن نفسي مش برتاح لما بكتب اي كلمة مستقبلية بدون كتابة المشيئة.......عارف ان رايي ممكن يكون غلط بس اسف والله انا بس بقول اللي جوايا

حامل المسك يقول...

السلام عليكم
ربنا يكرمك يا أسماء
وفعلا انتى نوهتى عن حاجة معظمنا مش واخد باله منها وهى ان الامل دايما بيتجدد وهنعيش الحياة دى بالطول بالعرض بس ازاى نستغلها فى اللى يحققلنا مصالحنا
وربنا ان شاء الله هيكرمك مادام انتى مصرة على الفكرة الطموحة دى

اسماء العريــان يقول...

ايمان حبيبتى ... بجد ببقى سعيدة اوى لما بشوف تعليقك عندى

ربنا يكرمك على الدعاء وربنا يستجيب ان شاء الله

اسماء العريــان يقول...
أزال المؤلف هذا التعليق.
اسماء العريــان يقول...

اخ انس .. كلامك فعلا صح

احنا لو خلينا الياس والاباط هو الى مسيطر علينا .. يبقى هنعيش .. بس مش هنغير

نحن لا ننتظر التغير ولكن نبدا به

اسماء العريــان يقول...

اخ مصراوى .. حضرتك عندك حق ف حكايه المشيئه

ان شاء الله وباذنه هتحصل كل الى كتبته فى التدوينه

جزيت خيرا على التنبيه


طموحى .. اسمك شدنى اوى ... جزيتى خيرا على المرورو والتعليق


لن استكين.. جزاكى الله خيرا على المرور

اسماء العريــان يقول...

اخ وضاح .. جزاك الله خيرا على المرور

كم اتمنى انها متكونش حاجه عامه

Rehab Saber يقول...

جميل جدا

ربنا يعزك

محمد عـنـانـى يقول...

يارب سهل لنا من امرنا وارزقنا خير الرزق واغفر لنا وارحمنا يارب العالمين

جزاك الله خير على تشريفك
تحياتى

مللت الصمت يقول...

و الله معاكى حق يا مؤه...

بس انا حاسه ان نزعه التشاؤم عنك زايده حبتين...

بقى كل ده عشان هتبدأى تذاكرى؟؟؟بلاها مذاكره يا ستى..


ولا واضح كده انك حزينه لانك عندك ف... ولا بلاش!!من ستر مسلما..


بس والله ربنا يكرمك يا مؤتى

AbdElRaHmaN Ayyash يقول...

:) تعليقي على كلمتين
من ذرة يأس .. مش هتطلعي ذرة أمل .لا .. انتي ممكن تطلعي قنبلة أمل .. بجد ممكنتعملي كل حاجه بتحويل ذرة اليأس دي لحاجه تانية انتي الوحيده اللي تقدري تحدديها
تحياتي
سلام

AbdElRaHmaN Ayyash يقول...

الكلمة التانية :) ..
النهاية
يا جماعه بالله عليكو اى حد يقرا البوست ده يدعيلى

عشان الواحد بجد اتخنق
:) الواحد مش اتخنق .. الواحد هيموت خلاص

حامل المسك يقول...

السلام عليكم
على فكرة يا أسماء معنى انك طرحتى هذا الموضوع دى بداية جامدة جدا ومعبرة عن ما بداخلك والبداية دى لو استمرت بنفس الحماس ده هتتحقى هتحققى هتحققى كل أحلامك
وأنا بلا شك بحييكى على البداية العظيمة دى وياريت تاخدى بايدنا
وأنا لا أنكر ولا أتحرج ان أقول انى تعلمت منك الكثير نعم الكثير
اكتسبت منك صفات ساعدت فى نمو شخصيتى وأصبحت بالفعل الان متحققة فى شخصيتى
كمان يا أسماء عايزة أقول انك مليانة مواهب وأفكار جامدة أوى والحمدلله انك ابتديتى تكتشفيها
حاجة كمان شخصيتك معتدلة جدا ومثالية أوى ما شاء الله فحافظى عليها ومتخليش حاجة تأثر فيها وأهم حاجة الثقة بالنفس مهما قال عليكى الناس
أنا أعتذر بشدة على الاطالة والملل ولو عوزتى أى حاجة لا تترددى

Dr.khaled يقول...

أستاذة /أسماء
اعذريني
لم تجيبي على نفسك أي إجابة صحيحة

الاجابة هي فيما رواه البخاري من حديث عائشة لما قال ورقة بن نوفل -رضي الله عنه- للنبي -ص-

(ما أتى رجل بمثل ما جئت به إلا عودي)
وهم
ما نقموا منك الا انك آمنتي بالله العزيز الحميد

وأنت كمسلمة...ملزمة بخوض المصاعب والتأقلم مع المتغيرات..حتى ولو كانت على غير هواك فالله خلقنا في كبد
أنفس لوامة تتصارع مع أخرى أمارة بالسوء

للوصول الى المطمئنة
ضرب اعتقالات انتهاك حرمات سرقات رشاوى انحلال فسق موسيقى اغاني افلام كليبات هرج ومرج
وفي وسط كل هذا يجب عليك التعايش مع كل هذه التناقضات
أدعياء جهاد وأدعياء سلفية ملزمة بالتعايش وسط هؤلاء
مبدعون ومفسقون ومكفراتية
ملزمة بالعيش وسطهم
مجرمون وتجار مخدرات ولصوص وقطاع طرق وشياطين انس وجن ومطبات صناعية وطبيعية وشهوات وشبهات
مجبرة على الالتزام بطريقك المستقيم وسطهم
دعوات علمانية وشيوعية ماركسية وليبرالية وقومية وشيعية وتنصيرية
ومطلوب منك التزام بهوية اسلامية على منهج الكتابة والسنة وبفهم الصحابة والتابعين

فقر ومسكنة وذل...يقابله فجر وعربدة وغنى فاحش
مطالبة بالاكل من الحلال

اصدقاء سوء..بنات متبرجات..شباب تائهون ضائعون لا هوية لهم ولا هدف
ليس امامكي خيار الا تحديد هدفك

جهل وأمية وتخاريف وقصص واهية وخوف من سحرة وذهاب الى منجمين وعرافين وقراءة حظك اليوم في الجورنال
ولابد لك من العلم والتعلم في ظل قلة العلماء الصادقين المتحققين بالعلم الشرعي


...وهلم جرا

كل ما كتبته فوق..هي الاعذار التي قد يلتمسها المرء لنفسها...علشان يقول
وانا هعمل ايه يعني..في وسط كل الحاجات دي؟؟
طبعا دي اعذار السلبيين وقعيدو الهمم
المطلوب
تعامل مع المعطيات حتى ولو كانت محدودة...
الشيخ احمد ياسين..رجل مشلول القدمين...لكنه سريع العدو نحو العدو
ما نام ولا تكاسل...بل استعمل امكانياته المتاحة اللي ربنا اداها له

وامثاله كثر
احفظ جزء قران..اعلمه للناس
اتعلمت معلومة جديدة اعلمها لامي ولاخواتي ولابويا وامي
اتعلمتي الخياطة...علمي جارتك
اتعلمتي الكمبيوتر ..علمي المقربين ليكي
اتعلمتي حرف جديد في لغة جديدة
نعلمه للناس
باختصار شديد
فاتقوا الله ما استطعتم
ولا يكلف الله نفسا الا وسعها
وفقك الله وسدد خطى والدك
وفك كربك
وهداني واياك وكل المسلمين الى صراطه المستقيم

السكندرى يقول...

الأخت أسماء سلام اله عليكى ورحمته وبركاته

أحييكى على هذا البوست الجميل
الملىء بمعنى الأمل وشحذ النفوس لتخطى عقباتها التى تواجهها

أختى الكريمة

أحب أن أوضح أن اذكرك بقول المولى عز وجل

وَاصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ (115) فَلَوْلَا كَانَ مِنَ الْقُرُونِ مِنْ قَبْلِكُمْ أُولُو بَقِيَّةٍ يَنْهَوْنَ عَنِ الْفَسَادِ فِي الْأَرْضِ إِلَّا قَلِيلًا مِمَّنْ أَنْجَيْنَا مِنْهُمْ وَاتَّبَعَ الَّذِينَ ظَلَمُوا مَا أُتْرِفُوا فِيهِ وَكَانُوا مُجْرِمِينَ (116) وَمَا كَانَ رَبُّكَ لِيُهْلِكَ الْقُرَى بِظُلْمٍ وَأَهْلُهَا مُصْلِحُونَ (117) وَلَوْ شَاءَ رَبُّكَ لَجَعَلَ النَّاسَ أُمَّةً وَاحِدَةً وَلَا يَزَالُونَ مُخْتَلِفِينَ (118) إِلَّا مَنْ رَحِمَ رَبُّكَ وَلِذَلِكَ خَلَقَهُمْ وَتَمَّتْ كَلِمَةُ رَبِّكَ لَأَمْلَأَنَّ جَهَنَّمَ مِنَ الْجِنَّةِ وَالنَّاسِ أَجْمَعِينَ (119) وَكُلًّا نَقُصُّ عَلَيْكَ مِنْ أَنْبَاءِ الرُّسُلِ مَا نُثَبِّتُ بِهِ فُؤَادَكَ وَجَاءَكَ فِي هَذِهِ الْحَقُّ وَمَوْعِظَةٌ وَذِكْرَى لِلْمُؤْمِنِينَ (120) وَقُلْ لِلَّذِينَ لَا يُؤْمِنُونَ اعْمَلُوا عَلَى مَكَانَتِكُمْ إِنَّا عَامِلُونَ (121) وَانْتَظِرُوا إِنَّا مُنْتَظِرُونَ (122) وَلِلَّهِ غَيْبُ السَّمَاوَاتِ وَالْأَرْضِ وَإِلَيْهِ يُرْجَعُ الْأَمْرُ كُلُّهُ فَاعْبُدْهُ وَتَوَكَّلْ عَلَيْهِ وَمَا رَبُّكَ بِغَافِلٍ عَمَّا تَعْمَلُونَ


أحب أن أعلق على الأية التى تقول

وَقُلْ لِلَّذِينَ لَا يُؤْمِنُونَ اعْمَلُوا عَلَى مَكَانَتِكُمْ إِنَّا عَامِلُونَ

فأقول لكى

ربنا عز وجل خلق الناس فريقين
فريق حق وفريق باطل

فإذا ظهر الباطل يوما على الحق
فوجب على فريق الحق أن يعمل لإظها الحق على الباطل

وهذا يتطلب العمل الكثير وعدم الكلل ولا الملل
وعدم اليأس

واذكرك بموقف النبى صلى الله عليه وسلم
حينما وعد سراقه بسوارى كسرى
وهو فى شدة كربه فى وقت مطارد فيه ومهاجر من وطنه

وأيضا موقفه وهو يحفر الخندق
ويقول الله أكبر فتحت فارس
ألله أكبر فتحت الروم
وهذا كان يقوله متى؟
وهو فى شدة كربه
حينما إجتمعت كل القبائل لمحاربته

هذين الموقفين للمصطفى صلى الله عليه وسلم
يدعوانا دائما للأمل وعدم اليأس حتى فى أصعب المواقف

وبعدين عايز أعرفك ان دى دنيا راحت ولا جت هى دنيا يعنى دار نصب ودار تعب
فلا راحة إلا فى الجنة

أخوكم أبو حنين السكندرى
www.geelsa7wa.blogspot.com

شــــمـس الديـن يقول...

السلام عليكم و رحمة الله و بركاتة

مقالك جميل حقا

عارفة ... انا بردوا كنت عملت المدونة لكدا
واحدةص احبتي كانت دائماتقول لي - زمانايام ما كنا في الكلية - ايام زمان و النضال حلوة ... دلوقتي معادتش موجودة , قولت لها بالعكس ...دلوقتي احنا اصعب و ايامنااصعب بكتير اوي ...
ادعي انت بس ربنا انه يرزقك الصحبة الصالحة الي تفهمك لان دي هبة من ربنا و لكن في نفس الوقت مش تفرطي في اصحابك القدماء دول

ربنا معاكي و مانا و مع كل الشباب اللي فاهم المؤامرة اللي بتحصل علي بلدة و علي كل شئ ... ربنا يستخدمنا لنصرة الحق ايا كان

و اتمني لك التوفيق الدائم
مع خالص تحياتي

مشروع انسان يقول...

جميل اوى ان الواحد يحب نفسه كما هى وانه يحاول يغيرها للاحسن وميسبش الاحزان وجلد الذات ده يؤثر عليه ويحسسه انه دايما مقصر ومش كويس اهم حاجة الواحد يحب نفسه واذا حبها هيعمل كتير اوى ويغير كتير اوى ويحس انها لازم تكون فى منزلة اكبر من اللى هى فيها يعنى الناس اللى غيروا العالم دول احسن مننا فى ايه
مش بشر زيينا ولا ايه000

nayra esam يقول...

السلام عليكم
اخييييييييييرا يا سمسمة عرفت اعمل ميل الحمد لله

تدوينتك طبعا جميلة كالمعتاد
وقرأت تدويناتك اللى فى مارس وطبعا لقيتها تحفة
ماشاء الله عليكى
ومستنيين التدوينة الجاية بفااااااااارغ الصبر
سلام عليكم

Dr.khaled يقول...

الاستاذة اسماء
جزاك الله خيرا
لي تعقيب بسيط فقط اذا سمحتي لي
رحمة الله على الاستاذ حسن البنا..ونسأل الله ان يجعله من الشهداء
لكن ...
لا يجوز ان نقول عن فلان ما انه شهيد الا من ورد فيه نص عن المعصوم -ص-

وقد بوب البخاري بابا في صحيحه قال (باب لا يقال فلان شهيد)

جزاك الله خيرا وبارك فيك

شهاب الأزهر يقول...

الغريب أنا أختنا ختمت التدوينة بقولها إنها ما زالت "مخنوقة"

أقترح عليك أخيتي أن تقرأي ما كتبت أنت مرة ثانية ولكن بهدوء وتروٍ

هل تعرفين لماذا أخيتي؟؟ لأنك تدوينتك هذه تنبض أملا ..

لقد قرأتها بينما كنت "مخنوقا" إن جاز التعبير -خاصة بعد اعتقال أخينا "أنا إخوان"- فكان الأمل المنبعث من بين سطورها مواسيا ...

أخيتي ... إليك وصفة مجربة ... فوق "سطح" العمارة، الساعة 12 بالليل كده والا حاجة ... تصلين ركعتين وانت بهذه الحالة .. وتقولين لمفرج الكروب : "أنا مخنوقة" .. وبثي لربك مخاوفك وآمالك وآلامك ..

ستلمسين فرقا بعدها في داخلك، بس ها الوصفة سر ... ما تطلعيها إلا للغالي


بارك الله في قلمك . . . تدوينتك الأخيرة ممتازة

محمد عـنـانـى يقول...

ليكى تاج عندى

لن أستكين يقول...

عاجل : الريس أتخطف يا رجالة
http://egyptianjokes.blogspot.com/2007/04/blog-post_14.html

ASW يقول...

هاعيش واتحدي اعدائي (الظلم-اليأس-الهم-الكسل-...........)

اللهم اجعل دعوتك اكبر همنا

تاسو بيدون يارجالة
http://e7lmma3aia.blogspot.com

اسماء العريــان يقول...

جزاكم الله خيرا كثيرا على الردود

ومبروك يا نيرة على الميل

اعذرونى على التاخير فى الرد ولكن يبدو ان هذا سيطول لفترة ما

وان شاء الله البوست القادم هجاوب على التاجات الى جاتلى من عند شروق ومن عند الاخ محمد العنانى

واعذرونى لو هتاخر عليكو شويه

كان نفسى ارد على واحد واحد بس معلش مش بمقدورى الان

جزيتم خيرا جميعا على الردود