السبت، ٢٨ أبريل ٢٠٠٧

كل عام وانتى بخير يا عائلتى




فى هذا الشهر بل فى هذا اليوم مولد اعظم رجل فى نظرى ولد ابى .. وولدت معه حياتى


فى يوم 28-4-1954 ولد عصام الدين محمد حسين العريان

وفى يوم 29-4 ولد ابراهيم عصام العريان

وفى يوم 5-5-2005 ولدت فاطمه الزهراء .. بنت اختى سارة

وفى يوم 13-5 ولدت سارة عصام الدين محمد العريان

وفى يوم 15-5 ولدت سميه عصام الدين محمد العريان

فى هذين الشهرين ولدت معظم عائلتى


واقول لهم كل عام وانتم بخير وبصحه وبسلام وعقبال مليون سنه تختموهم بشهادة فى سبيل الله

واقول رساله الى ابى فى يوم مولدة

الى اغلى اب واعظم رجل فى حياتى ... كل عام وانت الى الله اقرب .. وعلى طاعته ادوم .. كل عام وانت لسنه نبيه اتبع


كل عام وانت بخير وبصحه وسلامه وبدون اعتقالات


يارب دايما تبقى جنبى ومتبعدش عنى .. وان شاء الله هديتك عندى هتكون نجاحى .. ادعولى بقى انى انجح.. عقبال مليون سنه تختمهم بشهادة فى سبيل الله


احبك يا اعظم اب فى الوجود





مش لاقيالك صورة يا ابراهيم .. ملاقيتش غير دى تكون انسب صورة ليك :D :D




رساله الى اخى ابراهيم..

كل عام وانت بخير يا اخى الوحيد ... وعقبال ما نباركلك يوم بناءك....وربنا يسعدك انت وزوجتك دايما ... ويارب تسافر وتاخد المعادله ...وربنا ييسر لك حياتك ويسعدك ويرزقك الاولاد الصالحين












الى فى الصورة دى مع بابا تبقى بطوط الى هى فاطمه الزهراء....بنت اختى سارة

ورسالتى ليها


يالا يا بطوط اكبرى وورينا همتك فى المذاكرة واوعى تطلعى زى خالتك فى المذاكرة ... وكل سنه وانتى طيبه يا قمر ... وهديتك هتوصلك ان شاء الله ... غالبا هتبقى لعبه يا بطوط .. متطمعيش




ورساله لاختى الكبيرة سارة العريان


كل سنه وانتى طيبه يا اختى .. ربنا يسعدك فى حياتك ... ومبروك العربيه ... وعقبال لما نشوف حفصه وبطوط وعبد الرحمن فى الجامعه ان شاء الله ... وان شاء الله هيطلعو ذريه صالحه زى خالتهم :D:D


ورسالتى لسميه اختى ... دى بقى هتبقى فى بوست لوحده يوم ميلادها


يالا نستودعكم الله ... وياريت الكل يدعيلى

هناك ٢٩ تعليقًا:

يلا مش مهم يقول...

ياه
اول واحد يعلق علي البوست هو انا
ايه الحظ السعيد ده
الف الف الف مبروك علي عيد ميلاد الدكتور
وعلي اعياد الاسرة باكملها
بس اظن ان تفوقكم في الملوخية بالارانب يدفعكم الي استبدال التورتو والجاتوه الي حلو او طبق ملوخية بالارانب كبير
بس مش عارف هاتحطوه الشمع فين
ويللا مش مهم

mohamed يقول...

كل عام وهم جميعاً بخير

عيد ميلاد سعيد يا طبيب ابراهيم كل عام وانت بخير وابقي طمنا عليك وسلملي علي الكائن البيتوتي صديقك :D

شهاب الأزهر يقول...

كل عام وأنتم لربكم طائعي، لنبيكم تابعين، في الجنة طامعين، لدينكم رافعين.

sharkawoo يقول...

كل عام والدكتور عصام والدكتور إبراهيم بألف خير ...

جعلهم الله دائماً جنوداً في دعوة الله عز وجل ...

وإن شاء الله يوم ميلاد إبراهيم القادم يكون في بيت الزوجية ...

صاحب البوابــة يقول...

كل عام والعائلة كلها بألف خير

تحياتي

مشروع انسان يقول...

كل عام وانتم بخير وجعل الله من بيتكم منبر للجهاد وللدعوة فى سبيل الله ورزقنا الله واياكم الشهادة فى سبيله

غير معرف يقول...

السلام عليكم ورحمة الله وبركاته

كل عام وهم لله أقرب جميعا وبارك الله في عمر أبيك وأخيتك وأخوك وباقي عائلتك يا سومة

بس سؤال هو ليه إنت اللي طالعة بره في أعياد الميلاد علطول كده يا سومة متمردة :):)

أحبك في الله

أختك

اسماء العريــان يقول...

استاذ مجدى ... والله انا كنا لسه امبارح رايحين ناهيا وجيبنا سيرة الملوخيه بالارانب .. وقلنا لماما انتى خلاص اتشهرتى .. الاخوة كلهم بيطلبو منك الملوخيه بالارانب

نداء حبيبتى انا دايما كده من صغرى متمردة

يالا نعمل ايه بقى ... حتى فى الجامعه بيقولو عليا اخت متمردة

كل سنه وانتو بصحه وسلامه جميعا

غير معرف يقول...

كل سنة و انتو طيبين

:)

انا عندي بردو شهر تلاتة نص العيلة اتولدت فيه

و الهدايا بقى

بتبقى ولادة و خراب ديار

:D

غير معرف يقول...

هههه

متمردة حتي في الجامعة أتركيها لي أنا :) أنا أكتر واحدة عارفة مدي تمردك يا سومة

قعدوا يقولوا لي معاك أسماء متمردة وبعد كده فوجئت إنك غلبانة بس اللي يفهمك صح

علي العكس أنا حبيت جدا فترة تواجدنا في عمل واحد ولم يحدث شئ إلا كل خير الحمد لله

يمكن لإختلاف الكليات أو يمكن

لأن كلانا متمرد فاتفقنا مع بعض

كل سنة وأسرتك بخير وسعداء بيك يا أسماء

Rehab Saber يقول...

كل سنة وانتو طيبين

بن توفيق يقول...

كل عام وانت الى الله اقرب يا استاذنا ومعلمنا

وعقبال الـ 80 سنة ان شاء الله

About Me يقول...

كل سنة والدكتور عصام والعائلة كلها بخير يا رب
وعقبال 1000 سنه يا رب

غير معرف يقول...

كل عام وانت بخير

والعائلة كلها بخير

غير معرف يقول...

علي العموم يوم ميلاد الدكتور عصام يوم عيد لينا كلنا والله يعلم ان الدكتور عصام من احب الشخصيات الي قلبي وسلميلي بالله عليكي علي الدكتور عصام وقوليلو اني بحبه في الله ..امانه عليكي

غير معرف يقول...

جعله الله عام خير ومنة وبركة علكم جميعا ان شاء الله



الريدي

AbdElRaHmaN Ayyash يقول...

:) ما شاء الله
كل سنة وكل العيله طيبة وبخير
وكل سنة و الدكتور بصحة وسلامة
تحياتي
:)

آلاء الرحـمـن يقول...


كل سنه و عمو عصام بألف خير

سلاامنا لعمو يا سمسمه

اسماء العريــان يقول...

كل سنه وانتو كلكو بخير وصحه وسلامه

غير معرف يقول...

كل عام وأنتم جميعا بخير وبصحة وفى طاعة

وتحية خاصة لأخى فى الله د.عصام العريان
هذا الرجل الذى له فضل على الكثيرين ومنهم أنا حتى ولو لم يكن يعرفنى معرفة شخصية

قابلته فى مؤتمر القاهرة العام الماضى وكم كانت سعادتى حين التقطت لى صورة معه ، السعادة هنا مصدرها الطلب ذاته وليس الصورة فى حد ذاتها ، إذ عرفت من خلال ذلك الطلب وجها اخر للدكتور عصام العريان

شخصية فكاهية ومرحة كما تبين لى

التقط لى أخ صورة أولى معه فلم تعجبنى وظهرت مهزوزة على شاشة المحمول
ذهبت إليه أستأذنه فى صورة أخرى ، فإذ به يفاجئنى بقوله : الله
انت مش اتصورت مرة ، وكمان جايب مصور تانى غير الأولانى ، ماشى يا سيدى ، يلا تعالى وماله
ولم تفارقه الابتسامه الواسعة فى الصورة التى أعتز بها كثيرا

دمت لنا يا دكتور عصام ، وبارك الله فيك ونفع بك

فاروتا المصرى يقول...

كل عام وانت اخوان
كل عام وانت طيب يا د عريان
كل عام وانت على سنه نبينا العدنان
كل عام وانت احمل انسان
كل عام وانت حبيب الاخوان
كل عام يا دكتور يا فنان
كل عام وانت لمصر زى الشريان
كل عام وانت بصحه وسلاام
ابنك فاروتا المصرى الغلبان

Fahd يقول...

كل سنة وانتم بخير ورحمة وهناء ورضا وامان

محمد يقول...

يوم ميلاد الدكتور عصام حدث جليل

كل عام والأسرة الكريمة بخير

كل عام وأنتم جميعا مجتمعين على الخير

ولا فرق الله بينكم وبينه فأنا أعرف هذا المعنى وعشته

أعانكم الله

بنت الاسلام يقول...

سلام عليكم
كل عام والعائلة جميعا بخير وهى الى الله أقرب وعلى طاعته أدوم
وعقبال يوم ميلادك يا أسماء

على فكرة انتى نسيتى أهم فرد فى العيلة
جدو مبارك
يوم ميلاده 4/5 يعنى بعد بكرة هيتم ان شاء الله ان شاء الله 79سنة بس وكل عام
وهو الى الله أقرب
وكمان هو نفس اليوم اللى هيكون فيه
فرح(بعيد عنكم) عريس الشعب عمو جيمى
على رأى مصدر أمريكى انه اخر خطوة فى التوريث

عموما كل عام والعائلتان بألف خير وربنا يخليكوا لبعض جميعا
جدومبارك وعمو عصام
ماما سوزى وخلتو فاطمة
علاء وجمال وسارة وابراهيم وسمية وأسماء
محمد وعمر وحفصة وفاطمة-الأحفاد-

بنت يا أسماء تعالى خدى ملازمك بقى وخلصينى
الظاهر ان ربنا مش مبارك فى الملازم دى وخاصة ملزمة التاريخ
انتى عارفة طبعا صاحبها

ربنا يوفقك يا بنتى
مع السلامة بقى لحد متاخديهم

وليد يقول...

اولادى الاثنين مواليد شهر اربعة وخمسه برضه

كل سنه وانتم جميعا بخير

اسماء العريــان يقول...

كل سنه وانتو كلكو بصحه وسلامه

ويا بنت الاسلام بلاش انتى تكلمى فى الحاجات دى ... انتى عارفه اخرتها ايه

وبعدين الملازم دى غالبا مبصوص فيها

إخوانية مصرية يقول...

كل عام وانت جميعا بخير
جت متاخرة بس اعمل زحمة مواصلات بقي
يارب يثبتكم دائما علي طريقه ويعينك ويباركلك في ذريتك يادكتور ويرزقهم الازواج الصالحين
وكل عام والاسرة كلها في هنا وسعادة وخير
واستعملكم المولي دائما وابدا لما فيه خير هذا الامة وصالحها اللهم آمين

أخـــ مسلمة ـــت يقول...

عائلة مباركة

بارك الله فيكم

غير معرف يقول...

هذا كلام منقول من موقع سؤال و جواب أتمنى أن تستفيدي منه:
دلت الأدلة الشرعية من الكتاب والسنة على أن الاحتفال بالموالد من البدع المحدثة في الدين ولا أصل لها في الشرع المطهر ولا تجوز إجابة الدعوة إليها ، لما في ذلك من تأييد للبدع والتشجيع عليها . وقد قال الله سبحانه وتعالى: ( أم لهم شركاء شرعوا لهم من الدين ما لم يأذن به الله ) وقال سبحانه : ( ثم جعلناك على شريعة من الأمر فاتبعها ولا تتبع أهواء الذين لا يعلمون . إنهم لن يغنوا عنك من الله شيئاً وإن الظالمين بعضهم أولياء بعض والله ولي المتقين ) .
وقال سبحانه : ( اتبعوا ما أنزل إليكم من ربكم ولا تتبعوا من دونه أولياء قليلاً ما تذكرون ) .
وصح عن رسول الله صلى الله عليه وسلم ، أنه قال : ( من عمل عملاً ليس عليه أمرنا فهو رد ) أخرجه مسلم في صحيحه . وقال عليه الصلاة والسلام : ( خير الحديث كتاب الله وخير الهدي هدي محمد صلى الله عليه وسلم ، و شر الأمور محدثاتها وكل بدعة ضلالة ) . والأحاديث في هذا المعنى كثيرة.
ثم إن هذه الاحتفالات مع كونها بدعة منكرة لا أصل لها في الشرع هي مع ذلك فيها تشبه باليهود والنصارى في احتفالهم بالموالد . وقد قال عليه الصلاة والسلام محذراً من سنتهم وطريقتهم : " لتتبعن سنة من كان قبلكم حذو القذة بالقذة حتى لو دخلوا حجر ضب لدخلتموه : قالوا يا رسول الله : اليهود و النصارى ؟ .. قال : فمن ) أخرجاه في الصحيحين . ومعنى قوله " فمن" أي هم المعنيون بهذا الكلام وقال صلى الله عليه وسلم : "من تشبه بقوم فهو منهم "