لك الله يا أبى

كفاية يا مبارك

الصورة دى اخدناها لما بابا خرج من اعتقال 2005 ... واللى على الحيطه ورا بابا ده

مكتوب نورت البت  .. كنت انا الى عملاها  وبابا فرح بيها اوى وكان كل ما ييجى الصحفيين يصورها معاه

المهم احنا سبنا الزينه عادى بما ان كانت بنت اختى اتولدت ..  فقلنا نضرب عصفورين بحجر

لقيناهم جم اخدو بابا تانى .. رحنا قلنا نسيبها لحد ما يخرج .. وبالفعل خرج

بس للاسف شليناها دلوقتى.. بس اوعدك يا بابا ان الزينه المرة دى هتبقى مختلفه

السلام عليكم
 
تعديل

 "لم يخلو من رقم خمسة"  

من وانا طفله  بعانى من موضوع اعتقال ابى

تانى اعتقال ليه وانا عندى خمس سنين  .. سنة  95

اتحاكم عليه خمس سنين  ...  خرج وانا فى خمسة ابتدائى

قعد معانا خمس سنين

اتاخد تانى سنة 2005 ... فى شهر خمسة

خرج قعد معانا خمس شهور ...  اتاخد تانى فى شهر خمسة

والمرة دى خامس مرة يعتقل 


 "يوم الاعتقال" 

الخبر نزل عليا انا كالصاعقة .. لانى بصراحة مكنتش متوقعه خالص

المهم انا هاحكيلكم على اليوم من اوله من ساعة ما بابا اتمنع من السفر

انا كنت هدخل انام على غير عادتى على الساعه 12  .. بس لقيت بابا بيقولى بما انه عارف انى بسهر للفجر ,
اسماء صحينى الساعه 2

لان الطيارة كانت الساعة 6

المهم سهرت عشان اصحى بابا .. وبعدين سلم عليا وقالى عايزة ايه من تركيا وكده ( كان نفسه اوى انه يسافر )

وقالى كمان ... ابقى ابعتيلى  مسدجات  وانا فى تركيا  ومتنسنيش

المهم كملنا السهرة انا وماما لبعد الفجر عشان نطمن على بابا

وواقفين فى البلكونة لقيناه رجع

اول لما دخل البيت قعد يهزر معايا ويقولى شفتى جبتلك ايه من تركيا .. تعالو اتفرجو جبتلكو ايه ..

وانا والله حاسه ان كان من جواه مضايق قوى

المهم بعديها المفروض اننا بنتمشى بعد الفجر ... فانا اعتذرتلهم لانى كنت خرمانه نوم ..

المهم بعديها انا كان عندى خطوبة واحدة صحبتى فى اكتوبر ..

فقلنا بالمرة نروح نغير جو يومين فى شقتنا الى فى اكتوبر

واتفقنا مع بابا ان هو بعد ما يخلص الاجتماع بتاعه هيجيلنا على اكتوبر  وانا وماما سبقناه لاكتوبر ..

وهو قعد يجهز مع ماما الحاجات الى هناخدها معانا

وكانت الحاجات معاه فى العربية

رحت انا وماما اكتوبر .. هى راحت لاختى عقبال ما اخلص انا الخطوبة

وبعدين لقيت التليفون بيرن .. لقيته ابراهيم .. خير يا ابراهيم

اسماء امن الدوله عند عمو سناء واحتمال يجو عندنا

المهم انا كنت مطمنه شويه على اساس ان بابا مش فى البيت

عقبال ما قفلت مع ابراهيم لقيت سميه بتكلمنى .. بتقلى امن الدوله عندنا .. وكسرو الباب ..
انا ساعتها وشى اصفر وقلتلها طيب وبابا فين .. قالتلى معرفش  ( مكنتش تعرف لسه ان بابا اتاخد )

  المهم انا قاعدة كل ده اتصل ببابا يدينى مشغول ...
اتصلت بمحمد صقر زوج سميه اختى ... قالى انهم اخدو بابا وعمو سناء

ساعتها بقى قلبتلهم الخطوبه الى شىء تانى .. وانا عايزة اروح وحاجات من هذا القبيل

روحت انا وماما للهرم جينا لقيناهم مشيو من البيت خلاص

هما ملقوش حد غير زوجه اخويا .. بس هيا مكنش معاها مفتاح البيت .. فكسرو الباب .. وفتشو كل الغرف ... بس مسرقوش حاجه .. ومضو زوج خالتى على ورقة انهم مسرقوش حاجة ....  اخدو شوية مقالات  لابى بخط اليد .. وبعض اوراق تخصه

هنقضى رمضان لتالت سنه متتالية من غير بابا

ملحقش يغير جو فى اكتوبر  .... ملحقناش نحجز فى مصيف ونصيف

تالت صيف  على التوالى بابا ميقضيهوش معانا

منعوه من السفر لتركيا ... ومنعونا من المصيف  مع بابا

بجد مش عارفة اقول اية .. يمكن انا اكتر واحدة مضايقة لغيابة .. لانه كان هو الى معايا فى البيت هو وماما

بجد بجد .. البيت ملهوش اى طعم .. بجد بجد يا بابا وحشتونى .. غير اى مرة تانية

مستنياك



التصمايم دية كانت اتعملت ايام ما بابا كان معتقل السنوات الى فاتت

فلو حد بيعرف يصمم .. ياريت يصمملى بانر

ويبقى جزاة الله خيرا

دى بعض التصميمات لسه جايالى على الميل دلوقتى

والاستاذ احمد زايد كان عاملهم فى اعتقالات ابى الى فاتت وهو بردو الى عامل بعض التصميمات الى فوق دى

فجزاة الله خيرا











بناءا على طلب  الاخ مزاجات

دى بعض الصور الى عندى لبابا ... للاسف ملقيتهنمش كتير ومتواجدين على النت

بس هو فى بعض الصور العائلية على الموبايل .. ممكن حضرتك تنتظر لما انزلهم