الأحد، ١٦ سبتمبر ٢٠٠٧

يعنى ايه كلمة سجين




من رائعة الأستاذ مختار نوح "يعنى إيه كلمة سجين"

يعنى ييجى شهر صومنا
وكرسى بابا...يبقى فاضى ع الفطار
يعنى رغم المغربية
لسه صومنا له أذان
منتظر ييجى النهار
إحنا نفطر...لما نور الشمس يطلع
وقتها هندوق حلاوة...
من ليالى الصمت...والصبر الطوال
وقتها ندعى الدعا...
لما هيروح الظمأ
والعروق تتبل بالماء الزلال
عندنا للصوم معانى
والتلذذ لما اعانى
يعنى اصبر عالمشاعر
واحتمل حمل الجبال
يعنى أسعد باختيارى
وارتدى ثوب الرجال
يعنى ان القلب مش لازم ينام
يعنى ان الفجر ثمنه مش كلام
عندنا للصوم معانى
لما ليل الظلم يشتد فى بيوتنا
يلقى منا بيوت أغانى
لونها أبيض
زى بكره
الصيام له معنى غالى
الصيام له معنى عالى
وخلى كرسى بابا فاضى..وهبقى راضى
ان وقت الفطر لينا
يبقى فى العام الجديد
حتى ليلة القدر..والعيد السعيد
كلهم يستنوا عالباب الحديد
لما وحده ينفتح..أو يوم يزول
لما نور الصبح يطلع
بعد لما تزول يا خوف
لما سور السجن يسقط من الكسوف
لما نلقى
طاقة السجن الحزينة
تنتفض والناس تشوف
وقتها هيكون لصومنا
ألف معنى من معانى الافتخار
وأبقى عارف ان فخرى من صناعتك
وابقى وارث.. رغم إنك لسه حى


هناك ٧ تعليقات:

غير معرف يقول...

السلام عليكم
ــــــــــ
مش عارفة اقول ايه اشيد بالقصيدة اللي فوق رائعة طبعا بارك الله فيه
ن ولا اقول ليكي ربنا يرد ابيكي لكم ي اقرب وقت ممكن ويكون يارب وسطكم قبل العيد التي تقول عنه القصيدة
يارب
تحياتي

غير معرف يقول...

سلام عليكم

صادقه جدا
فك الله أسر كل المعتقلين
قريب ان شاء الله يا اسماء..
:)

أمنية..

دعوة الفردوس يقول...

انا مش عرافه اقول ايه بجد

بس انا عايزه اعرفك اني متابعاكي والله باستمرار و بندعيلك كتيييييييييير انتوا وكل المعتقلين

البرقي يقول...

كرسي بابا مش فاضي
كرسي بابا مكانه فوق الرؤوس
كرسي بابا مكانه بقلب الصدور
كرسي بابا علم اسماء وابراهيم واخواتهم انهم حافظين مكان بابا ومكانة بابا وقيم بابا
كرسي بابا مخوف كرسي مبارك عشان كدة بيحاول يفضيه
كرسي بابا منور ببابا حتي لو بابا مش قاعد عليه

محمد يقول...
أزال المؤلف هذا التعليق.
محمد يقول...

تحرك قلمي بعد قراءة هذه الكلمات

بـ

يعني إيه كلمة سجين ؟

أنا تعريفي غريب .. للسجين

يعني همسة حب غايبة عن ولاد المسجونين

يعني بسمة .. أيوة بسمة .. تايهة ضايعة من عيون أولاد سنين

يعني بابا لوحده جوه زنزانه حديد

يعني جدو يبكي دايما من فراق إبنه الحبيب

يعني ماما هيه ماما بس روحها مع السجين

يعني قلبي ينتفض لما أشوفه مكبلينه بالحديد

هو دا معنى السجين

أو بمعنى كان زمان يحكيه حكيم

السجين .. آه يا ولدي مالسجين

السجين .. اللي في قصوره يحتمي باسوار حديد

أو بعسكر .. جيش وأكتر مرصوصين

اللي يعصي الله ويظلم واحد أو ناس كتير

اللي يحرم أسرة كاملة من عائلهم الوحيد

اللي يجتاح البيوت وسط صرخات الجميع

اللي يمنع خير كبير .. أو يفرق مسلمين

اللي يحرم ناس كتير من حياة هادية في نعيم

اللي يمنع ناس تصلي .. للرحيم

تعرفوا اسم السجين ؟
تعرفوا بيت السجين ؟

إسمه في الدنيا .. زعيم

بيته في الآخرة الجحيم

هوه دا معنى السجين

وحسبنا الله ونعم الوكيل

حزيــــــــــــــــــن يقول...

السلام عليكم
اولا كل عام وانتم بخير

انا اول مره ادخل عند حضرتك
انا شاعر متواضع بس مفكرتش قبل كده اكتب عن حاجه مشابهه للقصيده دى

جايز لانى مش اخوانى

عموما اوعدك احاول اكتب عنه قصيده

كل عام وانت بخير
لا تحزنى

زمان كنا فى اتحاد الطلبه وبعدين اتمردنا على اخطاء موجوده فى المكان دا
فاتمنعنا من دخول الاتحاد تانى

وانا مش بفتخر بشئ غير دينى فى حياتى الا بالموضوع دا

خليكى فخورة بوالدك واحتسبى العمل لله